Аб стажыроўцы рэстаўратараў Нацыянальнага мастацкага музея Беларусі ў Францыі
06.04.2014 г.
У рамках дамоўленасці Пасольства Беларусі ў Францыі з Міністэрствам культуры Францыі на працягу сакавіка-красавіка 2014 года для беларускіх рэстаўратраў-супрацоўнікаў Нацыянальнага мастацкага музея Рэспублікі Беларусь арганізавана прафесійная стажыроўка ў Францыі.
Стажыроўка беларускіх рэстаўратараў адбываецца ў Нацыянальным інстытуце спадчыны і шэрагу вядучых музеяў Францыі.
Дадзенае мерапрыемства праходзіць у сувязі з правядзеннем Дзён беларускай культуры ў Францыі і ў рамках пашырэння беларуска-французскага супрацоўніцтва ў сферы культуры.
2 красавіка 2014 года ў Пасольстве Беларусі ў Францыі адбылася сустрэча Пасла Паўла Латушкі з Дырэктарам Дэпартамента міжнароднага супрацоўніцтва Міністэрства культуры Францыі Брюно Фавэлем, Генеральным сакратаром Нацыянальнага інстытута спадчыны Францыі Софі Сэйэр, супрацоўнікамі Міністэрства культуры і Нацыянальнага інстытута спадчыны Францыі з удзелам прадстаўнікоў Нацыянальнага мастацкага музея Беларусі.
У ходзе сустрэчы П. Латушка падзякваў Міністэрства культуры Францыі за арганізацыю і фінансавую падтрымку стажыроўкі беларускіх рэстаўратараў, якая паслужыць развіццю двухбаковага супрацоўніцтва ў сферы культуры.
Б. Фавэль адзначыў, што дадзеныя кантакты паміж рэстаўратарамі Беларусі і Францыі наладжваюцца ўпершыню і выказаў гатоўнасць спрыяць далейшаму двухбаковаму ўзаемадзеянню ў гэтай сферы пры падтрымцы Нацыянальнага інстытута спадчыны Францыі.
У ходзе сустрэчы таксама абмеркаваны перспектывы наладжвання ўзаемаадносін паміж музейнымі ўстановамі Беларусі і Францыі, арганізацыі візіту дырэктараў вядучых музеяў Беларусі ў Францыю.
