Аб удзеле беларускай дэлегацыі ў 216-й сесіі Выканаўчага савета ЮНЕСКА
17.05.2023 г.У перыяд з 10 па 22 траўня 2023 г. у г. Парыжы праходзіць 216-я сесія Выканаўчага савета ЮНЕСКА, у якой прымае ўдзел дэлегацыя Рэспублікі Беларусь.
У сваім выступленні падчас пленарнага паседжання 16 траўня 2023 г. намеснік Пастаяннага прадстаўніка Беларусі пры ЮНЕСКА Кірыл Грушэўскі пазітыўна адзначыў рэалізаваныя ў Беларусі пры падтрымцы Арганізацыі мерапрыемствы, у тым ліку ў рамках Праграмы ўдзелу і Сеткі кафедраў ЮНЕСКА, а таксама праінфармаваў пра правядзенне ў Беларусі пад патранатам ЮНЕСКА міжнароднай навуковай канферэнцыі «Сахараўскія чытанні-2023: Экалагічныя праблемы XXI стагоддзя».
Разам з тым прадстаўнік Беларусі выказаў шкадаванне ў сувязі з дзеючымі ў дачыненні да нашай краіны неправамернымі палітычнымі і эканамічнымі санкцыямі, а таксама прыняццем іншых дыскрымінацыйных рашэнняў, у тым ліку ў сферы спорту.
Беларусь у чарговы раз узняла пытанне захаванасці аб'екта Сусветнай спадчыны ЮНЕСКА «Белавежская пушча», на які негатыўна ўздзейнічае загарода, пабудаваная Польшчай на граніцы з Беларуссю. Канстатавана негатоўнасць Арганізацыі падтрымаць ініцыятыву Беларусі аб накіраванні ў Белавежскую пушчу экспертнай місіі для ацэнкі наяўных пагроз.
З мэтай умацавання навуковага і культурнага складнікаў мандата ЮНЕСКА Беларусь стала сааўтарам вылучаных Расіяй і Узбекістанам праектаў рашэнняў аб развіцці Сеткі Асацыяваных школ ЮНЕСКА і прыняцця мер у інтарэсах пераўтварэння выхавання і адукацыі дзяцей малодшага ўзросту. Беларусь таксама падтрымала ініцыятыву Мексікі аб абвяшчэнні ААН 2025 года Міжнародным годам квантавай навукі і тэхналогій.
У заключэнне прадстаўнік беларускай дэлегацыі адзначыў, што Беларусь і далей будзе выступаць у падтрымку ініцыятыў, накіраваных на падтрыманне міру і бяспекі.
