Аб уручэнні даверчых лістоў Паслом П.Латушкам Князю Манака Альберу II
26.04.2017 г.
25 красавіка 2017 г. адбылася афіцыйная цырымонія ўручэння даверчых лістоў Надзвычайным і Паўнамоцным Паслом Рэспублікі Беларусь у Княстве Манака па сумяшчальніцтве Паўлам Латушкам Князю Манака Альберу II.
Падчас размовы паміж П.Латушкам і Князем Манака апошнім была падкрэслена важнасць таго фактара, што Беларусь прызначыла першага ў гісторыі беларуска-манакскіх адносін Пасла ў Княстве Манака. Пасол Беларусі ў Манака па сумяшчальніцтве П.Латушка прадставіў бачанне беларускага боку развіцця адносін паміж дзвюма краінамі ў палітычнай, эканамічнай, гуманітарнай і іншых сферах.
Асаблівая ўвага была нададзена перспектывам развіцця гандлёва-эканамічнага супрацоўніцтва. П.Латушка паінфармаваў аб тым, што падчас сустрэчы з Генеральным сакратаром Эканамічнага савета Манака Алів’е Барэллі была дасягнута прынцыповая дамоўленнасць аб падпісанні пагаднення аб супрацоўніцтве паміж Беларускай гандлёва-прамысловай палатай і Эканамічным саветам Манака, а таксама аб правядзенні сумеснай беларуска-манакскай прэзентацыі магчымасцей гандлёва-эканамічнага і інвестыцыйнага супрацоўніцтва.
П.Латушка паінфармаваў Яго Светласць аб перспектывах рэалізацыі шэрагу праектаў у культурнай сферы: прапрацоўкі арганізацыі гастроляў Нацыянальнага балета Монтэ-Карла ў Беларусі і выступлення пераможцаў цыркавога фестываля, які штогод праходзіць у Манака. П.Латушка падкрэсліў, што ў бягучым годзе адну з вышэйшых узнагарод дадзенага фестываля атрымаў заслужаны калектыў Республікі Беларусь «Студыя цыркавога мастацтва «Арэна» з г.Гомеля.
Князь Манака Альбер II падкрэсліў важнасць развіцця супрацоўніцтва паміж дзюмя краінамі ў эканамічнай сферы, падтрымаў правядзенне сумеснай бізнэс-прэзентацыі, а таксама рэалізацыю праектаў у культурнай сферы. Падчас размовы былі закрануты пытанні развіцця супрацоўніцтва ў сферы спорту паміж краінамі: арганізацыі ў Беларусі Еўрапейскіх Алімпійскіх гульняў і ўдзелу прадстаўнікоў Беларусі ў міжнароднай канферэнцыі “Мір і спорт”, якая штогод праходзіць у Манака.
У гэты ж дзень адбылася сустрэча П.Латушкі з Саветнікам (Міністрам) па знешніх сувязях Княства Манака Жылем Танэллі, падчас якой абмеркаваны пытанні рэалізацыі вышэйзгаданых сумесных праектаў. У ходзе размовы абмеркаваны таксама перспектывы адкрыцця Ганаровага консульства Беларусі ў Манака.
Падчас завяршэння афіцыйнай цырымоніі ўручэння даверчых лістоў Пасол Беларусі ў Манака па сумяшчальніцтве П.Латушка перадаў у дар Князю Манака Альберу II фотаздымак, зроблены каля галоўнага ўвахода ў Нясвіжскі Палац у 1935 годзе падчас знаходжання ў г.Нясвіжы Князя Манака Луі II па запрашэнні Князя Альбрэхта Радзівіла. Таксама Князю Манака Альберу II быў перададзены альбом “Нясвіжскі Палац”, выдадзены пасля завяршэння рэстаўрацыі палаца і памятны медаль “Слуцкія паясы”. П.Латушка расказаў аб стварэнні мануфактур па вытворчасці слуцкіх паясоў прадстаўнікамі рода Радзівілаў на тэрыторыі Беларусі.