Аб уручэнні медаля Францыска Скарыны беларускаму спеваку Аркадзю Валадосю
17.02.2017 г.16 лютага 2017 г. у будынку Пасольства Беларусі ў Францыі адбылася цырымонія ўручэння медаля Францыска Скарыны за вялікі асабісты ўклад у прасоўванне беларускай культуры за мяжой вядомаму опернаму спеваку, ураджэнцу Беларусі, грамадзяніну Францыі Аркадзю Валадосю.
Медаль, якой спевак узнагароджаны згодна з Указам Прэзідэнта Рэспублікі Беларусь Аляксандра Лукашэнкі, уручыў А.Валадосю Пасол Беларусі ў Францыі Павел Латушка.
Даведачна. А.Валадось нарадзіўся ў Беларусі ў 1943 годзе. З'яўляецца вядомым оперным спеваком. На працягу больш за 10 гадоў быў вядучым салістам Марыінскага тэатра оперы і балета. З 1979 года пражывае ў Францыі. Лаўрэат шэрагу міжнародных конкурсаў, у тым ліку ў Бельгіі, Іспаніі, Францыі. Выступаў на вядучых оперных пляцоўках Еўропы.
А.Валадось заснаваў у Парыжы асацыяцыю ”Абмен: Францыя — Беларусь“, якая аказвае садзейнічанне ў наладжванні беларуска-французскага супрацоўніцтва ў галіне культуры і ўсталяванні дзелавых сувязяў.
З 1992 года А.Валадось рэгулярна праводзіў студэнцкія абмены паміж кансерваторыяй французскага горада Нансі і Беларускай акадэміяй музыкі.
Па ініцыятыве і пры непасрэдным удзеле А.Валадося з 1990-х гадоў на рэгулярнай аснове арганізоўваліся гастролі ў Францыю аркестра Рэспубліканскай гімназіі-каледжа пры Беларускай дзяржаўнай акадэміі музыкі і сімфанічнага аркестра ”Маладая Беларусь“ Беларускай дзяржаўнай акадэміі музыкі.
У 2015 годзе А.Валадось выступіў ініцыятарам і прыняў асабісты ўдзел у арганізацыі ўпершыню ў рамках адной з самых прэстыжных выстаў у свеце ”Art Capital“, якая праходзіць у Парыжы пад патранатам Прэзідэнта Францыі, нацыянальнага павільёна беларускіх мастакоў і скульптараў. Па выніках удзелу ўпершыню беларускія дзеячы мастацтва – мастачка В.Шоба і скульптар С.Парцянкоў – былі ўдастоены прэстыжнай ўзнагароды – прэміі Тэйлара.
На цырымоніі прысутнічалі прадстаўнікі французскай грамадскасці і беларускай дыяспары, якія пражываюць у Францыі.
